काठमाडौं, २० पुस । संघीय समाजवादी फोरम नेपालका अध्यक्ष उपेन्द्र यादवले एमालेले संसदको अबरोध फिर्ता गरे पनि संविधान संशोधनको प्रस्तावलाई आफूहरूले स्वीकार नगर्ने चेतावनी दिएका छन् ।
एमालेको अबरोधका कारण संशोधन प्रस्ताव अगाडि बढ्न सकेको थिएन । सर्वोच्च अदालतको आदेशसँगै एमालेले सदनको अबरोध खुला गर्न लचिलो भएको अर्को दिन संघीय फोरमका अध्यक्ष यादवले संशोधन प्रस्ताव अस्वीकार गरिदिएको बताए ।
नेपाली रेडियो नेटवर्कमा बुधबार बिहान पत्रकार ऋषि धमलासँग कुरागर्दै अध्यक्ष यादवले भने, ‘सरकारले ल्याएको संविधान संशोधनको प्रस्तावलाई यथाअवस्था स्वीकार गर्न सकिँदैन । परिमार्जन गरेर ल्याउनु पर्छ । होइन भने त्यसको जिम्मेवारी कांग्रेस र कम्युनिष्टहरूले लिनुपर्छ ।’
उनले मधेसीहरूलाई धोका दिन संशोधन प्रस्ताव ल्याएको दाबी गरे । ‘यसलाई मान्दैनौँ । प्रस्ताव अलपत्र पर्छ’, उनले भने, ‘परिमार्जनसहित आएन भने संविधान संशोधन प्रस्तावलाई समर्थन छैन । त्यसको जिम्मेवारी शेरबहादुर देउवाले लिन्छन् ।’
अध्यक्ष यादवले संशोधन प्रस्ताव पारित गराउने जिम्मेवारी र दायित्व आफूहरूको नरहेको बताए । ‘यसलाई पारित गराउने जिम्मेवारी हाम्रो होइन । कांग्रेस र माओवादीले बुझ्नु पर्छ । नेपाली जनताले यो संविधान स्वीकारेकै छैन’, उनले भने ।
संविधान संशोधन प्रस्ताव सहज रुपमा अगाडि बढ्ने विषयमा आफू विश्वस्त नरहेको अध्यक्ष यादवको भनाइ थियो ।
