संशोधन नभए कुनै पनि हालतमा चुनाव हुन दिन्नौं : मधेशी मोर्चा

काठमाडौं, ६ फाल्गुण । सरकारले एकातिर स्थानीय तहको निर्वाचनको तयारी गरिरहेको छ भने अर्कोतिर संयुक्त लोकतान्त्रिक मधेशी मोर्चाले आन्दोलन गर्ने चेतावनी दिँदै आएको छ । मोर्चाका नेताहरुले प्रचण्ड नेतृत्वको सरकार गठनका बेला भएको तीनबुँदे सहमतिअनुसार अविलम्ब संविधान संशोधन गरी संविधानका त्रुटिहरु सच्याउनुपर्ने अडानमा अहिले पनि अडिग नै छन् । 

मधेशी मोर्चासँग फेरि राजनीतिक बेइमानी हुने आशंका व्यक्त गर्दै मोर्चाका एक नेताले भने, ‘हाम्रो माग सम्बोधन नगरेर निर्वाचन हुन्छ भन्नु दिवास्वप्न मात्र हो ।’ ती नेताका अनुसार मोर्चाले निर्वाचनको मिति घोषणा भएकै दिन आन्दोलनमा जानेछ । मधेशी मोर्चाले संसदमा दर्ता भएको संविधान संशोधन विधेयक परिमार्जनसहित पास भएपछि मात्र चुनावमा जान सकिने बताउँदै आएको छ ।