मोर्चाद्धारा जनकपुरमा बृहत मशाल जुलुस प्रदर्शन

जनकपुर, फाल्गुण १० गते । 

संयुक्त लोकतान्त्रिक मधेशी मोर्चाले तराई मधेशमा स्थानीय चुनाव हुन नदिने घोषणागर्दै  आन्दोलनको कार्यक्रम अन्तर्गत जनकपुरमा विशाल मसाल जुलुस प्रदर्शन गरेका छन् ।
सरकारले स्थानीय चुनाव वैशाख ३१ गते घोषणा गरेलगतै मोर्चाका नेताहरुले पहिलो चरणको आन्दोलन कार्यक्रम घोषणा गर्दै साँझ जनकपुरको भानुचौकबाट मसाल जुलुस निकालिएको हो ।
मोर्चाको नेतृत्वमा भानुचोकबाट निकालिएको मशाल जुलुस जनकपुरको विभिन्न चोक भएर नगर परिक्रमा गरेको छ ।
मोर्चाले घोषणा गरेको संघर्ष कार्यक्रम अनुसार मंगलबार तराई मधेशका सदरमुकामहरुमा मसाल जुलुस र बुधबार मधेश बन्द गर्ने रहेकोछ ।

मोर्चाले बिहिबारदेखि १५दिन सम्म तराईका जिल्लाहरुमा भण्डाफोर कार्यक्रम चलाउने जनाएकोछ ।तमलोपा कार्यालयमा बसेको मोर्चाको बैठकले मन्त्री परिषदको निर्णय सार्वजनिक भएलगतै आन्दोलनको कार्यक्रम घोषणा गरेको हो । स्राेतःजनकपुर टुडे

अाज ६७ अाैँ राष्ट्रिय प्रजातन्त्र दिवस मनाइँदै

काठमाडौँ,  फागुन ७ गते ।
विसं २००७ फागुन ७ गते प्रजातन्त्र स्थापना भएको सम्झनामा आज देशभर विभिन्न कार्यक्रम गरी ६७ औँ राष्ट्रिय प्रजातन्त्र दिवस मनाइँदै छ । एक सय चार वर्षीय जहानियाँ राणा शासनको विरुद्धमा जनताले आन्दोलन गरी रगत बगाएपछि राणा शासकले जनतासमक्ष घुँडा टेक्न बाध्य भयो र प्रजातन्त्र स्थापना भएको घोषणा गरियो । तत्कालीन राजा त्रिभुवनको घोषणापछि राणा र नेपाली काँग्रेस सम्मिलित सरकार गठन भई नेपालमा प्रजातान्त्रिक शासनकालको सूत्रपात भएको थियो ।

प्रजातन्त्र स्थापनाका लागि भएको सङ्घर्षमा शुक्रराज शास्त्री, दशरथ चन्द, धर्मभक्त माथेमा र गङ्गालाल श्रेष्ठले विसं १९९७ माघमा बलिदानी दिनुभएको थियो । प्रजा परिषद् नामक राजनीतिक दल भूमिगत रुपमा स्थापना गरी प्रजातन्त्र स्थापनाका लागि जनतामा जागरण ल्याएको अभियोगमा उहाँहरूलाई मृत्युदण्ड दिइएको थियो ।

विसं २००० पछि स्थापना भएको नेपाल प्रजातन्त्र काँग्रेस र नेपाल राष्ट्रिय काँग्रेसको २००६ सालमा एकीकरणपछि नेपाली काँग्रेसका संस्थापक नेता बिपी कोइरालाको नेतृत्वमा भएको सशस्त्र र निर्णायक आन्दोलनले नेपालमा २००७ साल फागुन ७ गते प्रजातन्त्र स्थापना गरेको थियो ।

फागुन ७ मा प्रजातन्त्र स्थापना भएको सम्झनामा सरकारले प्रत्येक वर्ष राजधानीको टुँडिखेलमा औपचारिक कार्यक्रमको आयोजना गरी विशेष रुपमा यो दिवस मनाउँदै आएको छ । दिवसका उपलक्ष्यमा सार्वजनिक बिदा समेत दिने गरिएको छ । रासस

संशोधन नभए कुनै पनि हालतमा चुनाव हुन दिन्नौं : मधेशी मोर्चा

काठमाडौं, ६ फाल्गुण । सरकारले एकातिर स्थानीय तहको निर्वाचनको तयारी गरिरहेको छ भने अर्कोतिर संयुक्त लोकतान्त्रिक मधेशी मोर्चाले आन्दोलन गर्ने चेतावनी दिँदै आएको छ । मोर्चाका नेताहरुले प्रचण्ड नेतृत्वको सरकार गठनका बेला भएको तीनबुँदे सहमतिअनुसार अविलम्ब संविधान संशोधन गरी संविधानका त्रुटिहरु सच्याउनुपर्ने अडानमा अहिले पनि अडिग नै छन् । 

मधेशी मोर्चासँग फेरि राजनीतिक बेइमानी हुने आशंका व्यक्त गर्दै मोर्चाका एक नेताले भने, ‘हाम्रो माग सम्बोधन नगरेर निर्वाचन हुन्छ भन्नु दिवास्वप्न मात्र हो ।’ ती नेताका अनुसार मोर्चाले निर्वाचनको मिति घोषणा भएकै दिन आन्दोलनमा जानेछ । मधेशी मोर्चाले संसदमा दर्ता भएको संविधान संशोधन विधेयक परिमार्जनसहित पास भएपछि मात्र चुनावमा जान सकिने बताउँदै आएको छ ।